Turkye keur Finland se Navo-aansoek goed

Turkye sê hy het met die proses begin om Finland se aansoek vir lidmaatskap van die Noord-Atlantiese Verdragsorganisasie te bekragtig. Turkye het Finland se aansoek tot nou toe teengestaan, omdat die land volgens Turkye terroriste gesteun het. Finland, ‘n buurland van Rusland, en Swede het verlede jaar aansoek gedoen om tot die organisasie toegelaat te word, maar besware deur Turkye het verhinder dat dit toegestaan word. Turkye weier egter steeds dat Swede lid van Navo word. Die President van Finland, Sauli Niinisto, het intussen in Turkye aangekom en beklemtoon dat dit noodsaaklik is om Swede as Navo-lid te aanvaar.